2019 թ. հոկտեմբերի 25-27-ին ՀՀ Պաշտպանության նախարարության առնընթեր Հասարակական խորհուրդը (նախագահ ՀՀ Պաշտպանության նախարար Դավիթ Տոնոյան) համակարգող և նախարարի խորհրդական Գեղամ Հարությունյանը խորհրդի անդամների հետ կազմակերպեց այցելությունը Արցախի Պաշտպանության բանակի զորամասերը: Դասախոսական անձնակազմում ընդգրկված էին 27 հոգի, որոնց թվում՝ ՀՀ ԳԱԱ պատմության ինստիտուտի գիտական աշխատողները տնօրեն, ակադեմիկոս Աշոտ Մելքոնյանը, պատմական գիտությունների դոկտորներ Համլետ Հարությունյանը, Վահան Մելիքյանը, Արմեն Մարուքյանը, Գայանե Մախմուրյանը, Գևորգ Ստեփանյանը, Ռուբեն Սահակյանը, պատմական գիտությունների թեկնածուներ Մարիամ Հովսեփյանը, Անահիտ Խոսրոևան, Գուրգեն Վարդանյանը, Վահե Սարգսյանը, ինչպես նաև բուհական և գիտական հաստատությունների դասախոսներ:
Հոկտեմբերի 26-ին, մինչև զորամասեր մեկնելը, ժամը 9-ին տեղի ունեցավ հանդիպում Պաշտպանության բանակի հրամանատար, գեներալ-լեյտենանտ Կարեն Աբրահամյանի հետ: Նա ողջունեց ծրագրի մասնակիցներին և կարևորեց մտավորականների այցելությունները զորամասեր: Ապա հրամանատարը համառոտ ներկայացրեց առաջագծի օպերատիվ իրավիճակը: Գեներալի գնահատմամբ վերջին օրերի նկատվում է որոշակի լարվածություն, սակայն հակառակորդի բոլոր տեղաշարժերը վերահսկվում են մեր զինծառայողների կողմից: Հնարավոր գործողության դեպքում հրամանատարներին տրվել են համապատասխան կարգադրություններ և հանձնարարականներ: ՊԲ-ի ստորաբաժանումները պատրաստ են կասեցնել հակառակորդի ցանկացած գործողություն:
Գեներալ Կ. Աբրահամյանը անդրադարձավ նաև սույն թվականի սեպտեմբերի 27-ից մինչև հոկտեմբերի 5-ը կայացած զորավարժություններին (մեզ հանդիպելուց հետո նախարարի մոտ կայանալու էր խորհրդակցություն, որտեղ ամփոփվելու էին զորավարժությունների արդյունքները): Զորավարժություը իր ծավալով չուներ իր նախադեպը, քանի որ առաջին անգամ ներգավվել էր ողջ բանակային կազմը և մասնակցել էր ողջ պահեստազորը (նոյեմբերի վերջին նախատեսվում է պահեստազորի 7-օրյա հավաք, որը կատարվելու է համայնքային սկզբունքի հիման վրա):
Ինքնին հասկանալի է, որ հակառակորդը ուշի-ուշով հետևում է հայկական կողմի գործողություններին և զորավարժությունների նախապատրաստման նախօրյակին՝ սեպտեմբերի 22-ին ադրբեջանական կողմը դիվերսիայի փորձ կատարեց, որը խայտառակ կերպով ձախողվեց: Ինչպես նշեց գեներալը, մեր կողմից օգտագործված դիտարկման համակարգերի միջոցով հերքվեց ադրբեջանական կեղծ տեղեկատվությունը, թե իբր նրա զինվորները «մոլորվել» էին: Նույնը, հավանաբար, կարելի է ասել սեպտեմբերի 25-ին «մոլորված» հակառակորդի մարտական անօդաչու սարքի մասին, որը խոցվեց ՊԲ-ի ՀՕՊ-ի մարտական հաշվարկի փայլուն գործողության շնորհիվ:
Ծրագրի համակարգող և ՀՀ ՊՆ նախարարի խորհրդական Գ. Հարությունյանը շնորհակալություն հայտնեց գեներալ Կ. Աբրահամյանին ժամանակ գտնելու և դասախոսական կազմի հետ հանդիպելու և օպերատիվ իրավիճակը ներկայացնելու համար: Գ. Հարությունյանը ընդգծեց, որ ՀՀ Պաշտպանության նախարարության կողմից նախաձեռնած «Բանակ-հասարակություն» ծրագիրը նպատակ ունի նպաստել հայրենասիրական ոգու բարձրացմանը, հայոց ինքնության ճանաչմանը: Ձեռնարկը հաջողվել է ոչ միայն դասախոսական կազմի, այլև ՀՀ ՊՆ-ն, ՊԲ-ի և զորամասերի հրամանատարության ակտիվ գործունեության շնորհիվ: Այս հանգամանքը իր հերթին ոգևորել է բոլորին և խթան է հանդիսանում կրկնակի եռանդով շարունակել առաքելությունը: Գ. Հարությունյանը ներկա գտնվողների անունից հաջողություն մաղթեց գեներալ Կ. Աբրահամյանին և նրա գլխավորած զինված ուժերին:
ՀՀ ԳԱԱ պատմության ինստիտուտի տնօրեն, ակադեմիկոս Ա. Մելքոնյանը ևս կարևորեց մտավորականների այցելությունը ՊԲ, քանի որ «Զորամասերը մեզ համար դարձել են հարազատ տուն»: Ապա նա հետաքրքվեց, թե 2016 թ. ապրիլյան պատերազմից հետո ինչպես են ընթանում բանակի վերազինման աշխատանքները:
Գեներալ Կ. Աբրահամյանը ներկաներին մի շարք օրինակներով ներկայացրեց կատարվող լայնածավալ աշխատանքները, որոնք շարունակական են: Սարքավորումները հնարավորություն են տալիս օրվա բոլոր ժամերին ու ցանկացած եղանակային պայմաններում իրականացնել դիտարկում և արագ արդյունքները հասցնել հրամանատարությանը, որի համար օգտագործվում են կապի նորագույն համակարգեր: Նա միաժամանակ նշեց, որ կատարվել և շարունակվելու են իրականացվել ինժեներական ու ամրաշինական աշխատանքներ: Ավելի մեծ ուշադրություն է դարձվում առաջագծում կենցաղի բարելավմանը: Գեներալը ընդգծեց, որ բարձրացվել են առաջագծում մարտական ծառայություն կատարող սպաների ու ենթասպաների աշխատավարձերը:
Գ. Հարությունյանը անդրադարձավ նաև հատկապես շարքային զինծառայողների շրջանում ծխելու դեմ պայքարին: Նախարարը նշեց, որ բանակում աշխատում են պայքարել այդ վնասակար սովորության դեմ:
Հանդիպումից հետո դասախոսական կազմը մեկնեց տարբեր զորամասեր: ՀՀ ՊՆ հասարակական խորհուրդը նախատեսում է ևս երկու այցելություն ՊԲ: