2017 թ. դեկտեմբերի 19-ին ՀՀ ԳԱԱ պատմության ինստիտուտում տեղի ունեցավ ինստիտուտում գործող ԲՈՀ-ի հայոց պատմության 004 մասնագիտական խորհրդի նիստ:

ՕՐԱԿԱՐԳ

Քրիստինե Կոստիկյանի « Մատենադարանի պարսկերեն վավերագրերը հայոց պատմության սկզբնաղբյուր  (XVII դարի II կես - XIX դարի I կես)» դոկտորական ատենախոսության հրապարակային պաշտպանություն

Պաշտոնական ընդդիմախոսներ`  պ.գ.դ. պրոֆ., Մարգարյան Հ.Գ․
                                                    պ.գ.դ. ՀՀ ԳԱԱ թղթակից անդամ, Խառատյան Ա Ա․

Առաջատար կազմակերպություն՝ Երևանի պետական համալսարան

Բեռնել սեղմագիրը

2017 թ. հոկտեմբերի 19-20-ը Գորիսի պետական համալարանում տեղի ունեցավ «Սյունիքը կրթության և մշակույթի օջախ» խորագրով գիտաժողով՝ նվիրված համալսարանի հիմնադրման 50-ամյակին:

2017 թ․ հոկտեմբերի 28-ից 29-ը Հայաստանի գիտության ու մշակույթի մի խումբ գիտաշխա­տողներ ու դասախոսներ «Պատմության և մշակույթի էջեր»  ծրագրի շրջանակում հերթական այցելությունն իրականացրեցին Արցախի Հանրապետության Պաշտպանության բանակի զորամասեր և հանդես եկան դասախոսություններով։ Այցելություն-դասախոսությունը կազ­­մակերպել էր ՀՀ Պաշտպանության նախարարին առընթեր Հասարակական խորհուրդը Գե­ղամ Հարությունյանի գլխավորությամբ: Դասախոսությունները նվիրված էին Արցախի Հանրապետության 26-ամյակին:

Հոկտեմբերի 25-ին շարունակվեցին «Վենետիկի Մխիթարյան միաբանություն-300» միջազգային գիտաժողովի աշխատանքները «Մխիթարյանների գործունեությունը պատմագիտության ասպարեզում», «Մխիթարյանների ավանդը բանասիրության ոլորտում», «Արվեստը և մշակույթը Մխիթարյանների գործունեության մեջ» թեմատիկ բաժանմունքներում։ Երկօրյա գիտաժողովի ընթացքում գիտական կառույցների ինչպես ավագ, այնպես էլ երիտասարդ սերնդի մասնագետներ իրենց զեկուցումներում նոր մոտեցումներով և փաստերով ներկայացրին Մխիթարյանների գործունեությունը, անդրադարձան նրանց թողած գիտական հարուստ ժառանգությանը։

Գիտաժողովի ավարտին գումարվեց լիագումար նիստ, որը վարեց ՀՀ ԳԱԱ պատմության ինստիտուտի Հայ գաղթօջախների և սփյուռքի պատմության բաժնի վարիչ, պ.գ.դ. Գևորգ Ստեփանյանը։ Թեմատիկ բաժանմունքների նախագահողները (պ.գ.դ.Գևորգ Ստեփանյան, պ.գ.թ. Արմեն Մարուքյան, արվ.դ. Արարատ Աղասյան, բ.գ.թ. Հերիքնազ Որսկանյան, բ․գ․թ․ Սուսաննա Հովհաննիսյան) հաղորդումներ ունեցան բաժանմունքներում հնչած զեկույցների վերաբերյալ և ներկայացրին քննարկումների արդյունքում առանձնակի ուշադրության արժանացած բաց հարցերը։

2017 թ․ հոկտեմբերի 24-ին Գիտությունների ազգային ակադեմիայի նախագահության նիստերի դահլիճում մեկնարկեց «Վենետիկի Մխիթարյան միաբանություն-300» միջազգային երկօրյա գիտաժողովը։ Գիտաժողովը կազմակերպվել է  ՀՀ սփյուռքի նախարարության, ՀՀ ԳԱԱ հայագիտական և հասարակական գիտությունների բաժանմունքի, Երևանի պետական համալսարանի, Վենետիկի Մխիթարյան միաբանության նախաձեռնությամբ և ԿԳՆ գիտության պետական կոմիտեի աջակցությամբ։

2017 թ․ հոկտեմբերի 23-25-ին տեղի կունենա միջոցառումների շարք` նվիրված Վենետիկի Սուրբ Ղազար կղզում Մխիթարյան միաբանության հաստատման 300-ամյակին։ Միջոցառումը իրականացվում է ՀՀ սփյուռքի նախարարության, ՀՀ ԳԱԱ հայագիտության և հասարակական գիտությունների բաժանմունքի, Երևանի պետական համալսարանի, Մ. Մաշտոցի անվան հին ձեռագրերի գիտահետազոտական ինստիտուտի և Վենետիկի Մխիթարյան միաբանության նախաձեռնությամբ ։

Օրակարգում՝

Հոկտեմբերի 23, ժամը՝ 14։00, «Մխիթարյաններ. 300-ամյա պատմություն» ցուցահանդես (Մատենադարան, հասցե՝ Մաշտոցի 53)

Հոկտեմբերի 24-25, ժամը՝ 10։00 «Վենետիկի Մխիթարյան Միաբանություն-300» միջազգային գիտաժողով (ՀՀ ԳԱԱ նախագահության նիստերի դահլիճ, հասցե՝ Մ․ Բաղրամյան 24)։

Միջոցառումների ծրագիրը կարող եք ներբեռնել այստեղ

Հոկտեմբերի 17-ին ՀՀ ԳԱԱ պատմության ինստիտուտի տնօրեն, ակադեմիկոս Աշոտ Մելքոնյանը և Ռումինիայում ՀՀ դեսպան Համլետ Գասպարյանը Բուխարեստում հանդիպումներ ունեցան Ռումինական Ակադեմիայի Հրվ.-արլ. Եվրոպական ուսումնասիրությունների ինստիտուտի տնօրեն դոկտ. Անդրեյ Տիմոտինի, այնուհետև Նիկոլայե Յորգայի անվ. պատմության ինստիտուտի տնօրեն դոկտ. Օվիդիու Կրիստեայի հետ, քննարկելու համար գիտական համագործակցության հարցեր` ՀՀ ԳԱԱ-ի և Ռումինական Ակադեմիայի միջև 2013թ. ստորագրված Համաձայնագրի շրջանակներում: Աշխատանքային քննարկումների ընթացքում ուրվագծվեցին այն թեմաները, որոնք կարող են հետաքրքրություն ներկայացնել համատեղ ուսումնասիրությունների համար, ինչպես նաև համագործակցության ձեւերը: Այդ կապակցությամբ երկուստեք կարևորվեց ռումինահայ հարուստ պատմամշակութային ժառանգությունը, երկու ժողովուրդների պատմական առնչությունները, ինչպես նաեւ գիտական այն արժեքավոր ժառանգությունը, որը թողել են ռումին ականավոր պատմաբան Նիկոլայե Յորգան, նրա մերձավոր գործակից, նշանավոր հայագետ եւ արեւելագետ Հակոբ Սիրունին: